ЭХЭМҮТ-ийн засварын ажлын 95 хувийг гүйцэтгэжээ

Эрүүл мэндийн сайд С.Энхболд ЭХЭМҮТ-д өнөөдөр ажиллаж Засгийн газар, ЭМЯ-ны хөрөнгө оруулалтаар хийгдэж буй барилга байгууламж, их засваруудтай танилцлаа. Тус төв 1987 онд баригдсан бөгөөд түүнээс хойш их засвар хийгээгүй юм. Энэ онд тус төвийн төрөх тасгуудыг олон улсын жишигт нийцүүлэн засварлах их засварын ажлыг эхлүүлсэн. Засварын ажил 95 хувийн гүйцэтгэлтэй явж байгаа бөгөөд 10 дугаар сарын 1-ний өдөр хүлээлгэн өгөхөөр ажиллаж буй гэдгээ гүйцэтгэгч байгууллага хэллээ. Мөн тус төвд Хавдрын эрт илрүүлгийн төв, 150 хүүхдийн багтаамжтай байгууллагын дэргэдэх цэцэрлэгийн барилгын ажлууд үргэлжилж байна. 2021 онд Эрүүл мэндийн яамнаас ЭХЭМҮТ-д 12.9 тэрбум төгрөгийн тоног төхөөрөмжийн шинэчлэл хийсэн бөгөөд энэхүү хөрөнгө оруулалт болон их засварын хөрөнгө оруулалтыг Ерөнхий сайд Л.Оюун-Эрдэнэ тус төвд ажиллах үедээ шийдэж байсан билээ. Засгийн газраас эх, хүүхдийн эрүүл мэндэд онцгой анхаарч, 2021 онд эх хүүхдийн эрүүл мэндийн салбарт хамгийн өндөр хөрөнгө оруулалт 35 тэрбум төгрөгийг шийдвэрлэсэн. Тус хөрөнгө оруулалтаар улс орон даяар төрөх ор, эх хүүхдийн хэвтэн эмчлүүлэх орыг бүрэн шинэчилж, монголд эмчлүүлэх боломжгүй байсан хүүхдийн гурван өвчний оношилж, эмчилж чаддаг болсны зэрэгцээ, эхо, рентген, мэс заслын багаж, амьсгалын аппарат зэрэг нэн шаардлагатай тоног төхөөрөмжүүдээр хангасан. Үүний дараа сайд Хүүхдийн зөвлөх поликлиникийн төрөлжсөн мэргэшлийн кабинетуудаар явж иргэд үйлчлүүлэгчийн нөхцөл байдалтай танилцаж, эмч эмнэлгийн ажилчдын санал бодлыг сонсов.
Мэдээ таалагдсан бол like share хийн үү |
    twitter     share     23    0