“Дэлхийн экспортыг дэмжих форум”-ыг 2023 онд зохион байгуулна

Цар тахлын улмаас хойшлогдоод байсан “Дэлхийн экспортыг дэмжих форум”-ыг Монгол Улсын Ерөнхийлөгчийн ивээл доор Улаанбаатар хотноо 2023 онд зохион байгуулна. ХХААХҮЯ-ны Төрийн нарийн бичгийн дарга Т.Жамбалцэрэн Олон улсын худалдааны байгууллагын Орлогч захирал Дороти Тембо тэргүүтэй төлөөлөгчдийг хүлээн авч уулзах үеэрээ “Дэлхийн экспортыг дэмжих форум”-ын бэлтгэл ажлын талаар санал, мэдээлэл солилцов. Тэрбээр, форумыг зохион байгуулах хүрээнд хамтран ажиллаж, мэдээлэл солилцон, шаардлагатай дэмжлэг үзүүлэхээ илэрхийлсэн юм. Олон улсын худалдааны байгууллагын Орлогч захирал Дороти Тембо нь энэ форумыг зохион байгуулахад Монгол Улсын ХХААХҮЯ чухал байр суурь эзлэх бөгөөд тус яамны дэмжлэг оролцоо чухлыг онцолжээ. “Дэлхийн экспортыг дэмжих форум” нь Женев хотноо төвтэй Олон улсын худалдааны төвийн дэмжлэг, оролцоотойгоор тухайн улсын Засгийн газартай хамтран 1999 оноос жил бүр зохион байгуулагдаж байгаа. Форум нь хөгжиж буй орнуудын худалдаа, экспортыг дэмжих, жижиг, дунд үйлдвэрүүдийг бараа, бүтээгдэхүүнээ олон улсын зах зээлд гаргах, дэлхийн болон бүс нутгийн нэмүү өртгийн сүлжээнд нэгдэхэд нь дэмжлэг үзүүлэх зорилготой аж.
Мэдээ таалагдсан бол like share хийн үү |
    twitter     share     43    0