Монгол, Литва харилцан Өргөмжит консул томилно

Монгол Улсын Гадаад харилцааны яам, Бүгд Найрамдах Литва Улсын Гадаад хэргийн яамны улс төрийн тавдугаар зөвлөлдөх уулзалт энэ дугаар сарын 22-нд Улаанбаатар хотноо болов. Уулзалтад Бүгд Найрамдах Литва Улсын Гадаад хэргийн яамны Латин Америк, Африк, Ази, Номхон далайн орнуудын газрын захирал Элчин сайд Аудриус Брюзга оролцов. Энэ үеэр хоёр орны нийгэм, эдийн засгийн өнөөгийн байдал, хөгжлийн зорилтуудын хэрэгжилтийн талаар талууд мэдээлэл солилцож, Монгол, Литва Улсын хоёр талын болон бүс нутаг болон олон улсын байгууллагын хүрээнд өрнүүлж буй хамтын ажиллагааны өргөн асуудлаар ярилцав. Тухайлбал, хоёр тал харилцан айлчлал хэрэгжүүлэх, Монгол, Литвийн худалдаа, эдийн засгийн харилцааг өргөжүүлэх боломжийг эрэлхийлэх, соёл, боловсрол, тээврийн салбарт хамтын ажиллагааг эрчимжүүлж ажиллахаар талууд тохиролцов. Мөн хоёр тал харилцан Өргөмжит консул томилох нь харилцаа, хамтын ажиллагааг урагшлуулахад чухал гэдэгтэй талууд санал нэгдэж, энэ чиглэлээр ойрын хугацаанд тодорхой шийдвэр гаргана гэдгээ илэрхийлэв.
Мэдээ таалагдсан бол like share хийн үү |
    twitter     share     42    0