Сансрын нисгэгч П.В.Савиныхт ШУА-ийн “Хүндэт доктор” цол олгов

ЗХУ, БНМАУ-ын сансрын хамтарсан нислэгийн 40 жилийн ойн хүрээнд манай улсад айлчилж буй ЗХУ болон БНМАУ-ын баатар, сансрын нисгэгч В.А.Жанибеков, П.В.Савиных, Монголын анд нөхдийн нийгэмлэгийн тэргүүн В.А.Бабушкин нарыг ШУА-ийн дэд ерөнхийлөгч Г.Чулуунбаатар өнөөдөр хүлээн авч уулзлаа. Уулзалтын үеэр сансрын нислэгийн үеийн дурсамж яриа өрнүүлж, цаашдаа монголоос хоёр дахь нисгэгчийг бэлтгэх талаар санал солилцсон юм. Монгол Улсын хувьд хоёр дахь сансрын нисгэгч эмэгтэй хүн байх санал дэвшүүлж байгаа бөгөөд энэ талд ОХУ-ын сансрын нисгэгчид дэмжиж байгаагаа илэрхийлэв. Тэд хэлэхдээ, “Эмэгтэй хүн сансарт нисгэх санаачилгыг бид маш эергээр хүлээн авч байна. Туршилтаас үзэхэд сансрын хөлөг дээрх зарим ажилбарыг эмэгтэй хүн эрэгтэй хүнээс илүү хийдэг нь харагдсан. Гэхдээ эмэгтэй хүн задгай сансарт гарахыг бид таашаадаггүй. Энэ бол маш хэцүү ажил. Дараагийн сансрын нислэг хийхэд ажлын даалгавраа тодорхой болгох хэрэгтэй. Бидний үзэж байгаагаар дараагийн судалгаа нь эрүүл мэнд, геологи, экологийн чиглэлийн ажил явуулах нь зөв байх гэж үзэж байна. Дээрх саналыг ажил хэрэг болгоход хоёр тал одооноос бэлтгэл ажлаа хангаж ажиллах хэрэгтэй” гэлээ. Уулзалтын хүрээнд Монгол Улсын ШУА-иас ЗХУ, БНМАУ-ын сансрын хамтарсан нислэгээр 40 жилийн ойг тохиолдуулан В.А.Жанибеков, В.А.Бабушкин нарыг ШУА-ийн “Хүндэт жуух”-аар шагнасныг гардуулж өглөө. Мөн П.В.Савиныхт ШУА-ийн“Хүндэт доктор” цол олгов. Сансрын нисгэгч П.В.Савиных нь ЗХУ-ын хоёр удаагийн баатар, БНМАУ-ын баатар бөгөөд ОХУ-ын төрийн соёрхолт эрдэмтэн, техникийн шинжлэх ухааны доктор, Оросын ШУА-ийн академич хүн юм. Түүнийг Монгол-Оросын шинжлэх ухааны салбарт тэр дундаа сансар судлалын салбарыг хөгжүүлэхэд үнэтэй хувь нэмэр оруулсныг үнэлж “Хүндэт доктор” цол олгож байгаа юм. Академич П.В.Савиных 1981 оны хамтарсан нислэгийн эрдэм шинжилгээ, туршилтын ажлыг явуулахад онцгой хувь нэмэр оруулсан эрдэмтэн юм. Тэрбээр 1981 оны 10-р сард БНМАУ-ын баатар цол хүртжээ. Ташрамд дурдахад, П.В.Савиных 7 удаа, В.А.Жанибеков 5 удаа сансарт ниссэн аж.
Мэдээ таалагдсан бол like share хийн үү |
    twitter     share     46    0