Б. ИДЭР-ОД: ИРГЭН БҮР ӨӨРСДИЙНХӨӨ ХЭМЖЭЭНД БАЙГАЛИА ХАМГААЛЖ ЧАДВАЛ ИРЭЭДҮЙД БИД УСНЫ ХОМСДОЛ, ЦӨЛЖИЛТ, ЗЭРГЭЭС СЭРГИЙЛЖ ЧАДНА

Монгол улс цэвэр усны нөөцөөрөө дэлхийн 145 орноос 22-т эрэмблэгддэг боловч усыг хуримтлуулах, нөөцлөн ашиглагдаггүйгээс усны нөөц хамгийн бага 20 орны тоонд багтдаг. Өнгөрсөн оны байдлаар манай орны 264 гол мөрөн, 704 булаг шанд, 286 нуур тойром, 12 рашаан ширгэжээ. Олон нийтэд бодит байдлыг мэдээллэх, усыг хайрлан хамгаалах, гамнаж сурах зөв дадал хэвшүүлэх зорилгоор БОАЖЯ, ЦЕГ-ын Экологийн цагдаагийн алба хамтран “Цэнхэр алт усаа хайрлая” нэгдсэн арга хэмжээг амжилттай зохион байгуулж өнөөдөр хаалтаа хийлээ. Тус аянаар ард иргэд тэр дундаа залуу үед чиглэсэн нөлөөллийн ажлыг түлхүү өрнүүлсэн юм. Тухайлбал, хэвлэл мэдээллийн хэрэгслээр болон нийгмийн цахим сүлжээнд 100 орчим постер, 40 гаруй шторк, 400 гаран мэдээ, мэдээллийг бэлтгэн олон нийтэд хүргэснийг давхардсан тоогоор 7,2 сая хүн үзжээ.
 
Засгийн газрын хэрэгжүүлэгч агентлаг Усны газрын дарга Ш.Мягмар: “Дэлхийн дулааралд хамгийн их өртөж, эмзэгшиж байгаа орны нэг бол манай Монгол орон. Үүнээс шалтгаалан маш олон сөрөг нөлөө байгаль дэлхийд гарч байгаа. Үүний нэг нь усны хомдсдол. Бид усыг үйлдвэрлэдэггүй. Тиймээс байхгүй усыг бий болгох боломжгүй. Харин байгаа усаа нөөцлөх, арвилан гамнах, хайрлах хамгаалж сурах зайлшгүй хэрэгцээ тулгараад байна.  Энэ хүрээнд хэрэгжүүлсэн аян өнөөдөр өндөрлөж байна. Залуусд тодорхой хэмжээнд нөлөөлж, эерэг үр дүнгүүд гарч чадсан гэж дүгнэж байгаа.”
 
 
Цагдаагийн хурандаа Г.Арсланхуяг: “Аяны хүрээнд иргэд, олон нийтэд зайлшгүй мэдэх шаардлагатай тоо баримт, улс орны нөхцөл байдаг, усны чиглэлээр авах арга хэмжээний талаарх мэдээ, мэдээллийг бэлтгэн хүүхэд залууст чиглэсэн нөлөөллийн ажлыг олон сувгаар хийлээ. Аянаас бид нэг л үр дүнг хүлээж байгаа. Энэ нь ард иргэд, тэр дундаа залуу үедээ усны хэрэглээний зөв дадлыг суулгах юм. Усыг гамнадаг болгоё, хайрлаж хамгаалж сургая, үнэ цэнийг нь ойлгуулая. Бид цэвэр усыг ахуйн хэрэглээндээ, машин угаахдаа, бие засахдаа хүртэл гамналгүй урсгаж байна. Энэ замбараагүй хэрэглээг хязгаарлах, саарал усны талаарх мэдлэг, мэдээллийг нэмэгдүүлэх, хэрэглээнд хэвшүүлэх зэрэг олон ажлыг аяны үргэлжлэл болгон цаашид хийхээр төлөвлөсөн байгаа.”
 
Б.Идэр-Од: “Цэнхэр алт усаа хайрлая аянд дэмжигч иргэний хувьд идэвхтэй ороцлоо. Одоогоор үр дүнгийн тухай ярих арай эрт байх. Гэхдээ бид юу ч хийлгүй зүгээр сууснаас дээр эерэг өөрчлөлтүүд гарсан гэж бодож байгаа. Миний хувьд бидний тэр бүр мэддэггүй усны талаарх мэдээ, мэдээллийг мэргэжлийн байгууллагаас авч олон нийтэд энгийн, ойлгомжтой түгээх гэж хичээн ажилласан. Энэ хугацаанд миний анзаарч, ажигласан нэг зүйл бол бид байгаль орчин, эх дэлхийн эрүүл мэнд гэдгийг өөрөөсөө дэндүү хол гэж боддогт асуудал оршдог юм байна. Байгаль орчны яам, эсвэл экологийн цагдаагийн алба л энэ асуудлуудад анхаарч, ажиллах ёстой биш. Харин иргэн бүр өөрсдийнхөө хэмжээнд байгалиа хамгаалах, хайрлах, нөхөн сэргээх алхмуудыг хийж чадвал бид ирээдүйд усны хомсдол, цөлжилт, дэлхийн дулаарал зэргээс хамгаалж чадах юм байна. Хүн бүр үүнийг ойлгоосой, ойлгоод зогсохгүй үйлдэл хийгээсэй гэж чин сэтгэлээсээ хүсч байна.”

Цэнхэр алт болсон цэвэр усаа хайрлахгүй бол Монгол улс 2028 оноос эхлэн хомсдол үүсэж, 2050 он гэхэд цэвэр усны хомсдолд бүрэн орно гэдгийг албаны хүмүүс хэлж байна.

Мэдээ таалагдсан бол like share хийн үү |
    twitter     share     83    0